Registre B34 Lettre n° 49 17/08/1532 <167 verso> Remission pour Marye de Noual, la verificacion aux juges du ressort. <168 recto> [1] Francois, etc, savoir faisons, a tous presens et advenir, nous [2] avoir receu l'humble supplicacion et requeste des parens [3] et amys consanguins de Marye de Nouale, damoyselle, femme [4] Yvon Johannou, detenue prisonniere d'auctorité de notre court [5] du ressort de Gouelly, Contenant que le mardy des feries de Pasques [6] dernieres, ladite Marye alla au pardon a la chappelle Saint Jehan [7] a Kerdanel duquel lieu y avoit grande assemblee de gens [8] pour gaigner ledit pardon. Et apres avoir ladite Marye [9] faict son oblacion en ladite chappelle, se trouva a boyre et [10] fere bonne chere avecques Ollive Kermoysan, sa mere, [11] Tugdual de Noual et Morice de Noual, ses freres, Pierre [12] de Velle, Jehan Martin, Pierres de Plusquellec, Jehan Plusquellec, [13] Kerdirec et autres. Et apres avoir fort beu et faict grande [14] chere, ledit Tugdual dist audit Martin et autres desurdit [15] en poyant une quarte de vin : « Me lesserez-vous mourir [16] yci avec ung villain ! » A quoy luy fut respondu par lesdits [17] asistans qu'il n'y avoit villain a l'asemblee qu'il luy [18] eust faict deplaisir en leur compaignye. Et lors, ledit [19] Martin qui estoit fort troublé et eschauffé de vin, demanda [20] audit de Noual qu'il eust a luy montrer ledit home. Et [21] s'en allerent lesdits Tugdual de Noual et Martin en une [22] maison illecques pres en laquelle, ainsi que a ouy [23] dire ladite Marye, ledit Tugdual de Noual rompit l'huys [24] d'une chambre haulte pour y entrer esperant trouver [25] celuy home dont il s'estoit plainct. Et en sortant de ladite [26] maison pres d'une taverne que tenoit Yvon Lecren pres [27] ladite chapelle, soy trouverent ung nommé Yvon Le Beveillon [28] et ung nommé Guillaume de Kergouel qui estoit maryé a [29] une seur dudit de Noual et de ladite Marye, qu'ilz faisoint [30] contenante de s'entre voulloir baptre en la presence desdits [31] Pierres de Velle, Pierre de Plusquellec, de Noual et [32] Martin. Et lors ledit de Plusquellec evagina son espee [33] et en donna ung coup de plat sur la teste dudit Beveillon. [34] Et ledit Martin evagina pareillement son espee de laquelle [35] il frapa ledit Beveillon plusieurs coups de plat sur la teste, [36] espaulles et autres endroictz de son corps. Et sur ce ledit [37] Beveillon print ledit Martin aulx cheveulx et l'abatit [38] a terre. Et ce voyant, ladite Marye de Noual elle s'aprocha [39] du lieu ou estoint lesdits Martin et Beveillon et estante [40] presente print ledit Beveillon aulx cheveulx en le levant [41] par les cheveulx de dessus ledit Martin. Et en icelluy conflit [42] et debat ayant ledit Martin sadite espee evaginee icelluy [43] Martin blecza ledit Beveillon au gras l'une de ses [44] jambes. A raison duquel coup alla ledit Beveillon [45] par default de bon traictement ou autrement dedans vingt quattre [46] heures apres de vie a deceix. Et sur ce que lors <168 verso> [47] l'on disoit audit Martin que ledit Beveillon estoit pres [48] que mort ledit Martin tout esmeu et eschauffé de vin, [49] dist que si ledit Beveillon n'estoit mort qu'il eust parachevé. [50] Combien toutesfoiz qu'il ne luy touscha desoncques [51] puys et qu'il ne esperoit pas que ledit deceix fust avenu [52] actendu que ladite bleczeure n'estoit en lieu mortel. [53] Si nous remonstrent outre lesdits suplians que jamays